大年初七要“称人” | |
| 文章分类：民俗文化 作者：夏娃 来源：夏娃网 发布时间：2021/2/18 16:53:46 | |
|
记得有一年年初七，我中饭吃饱“赤豆饭”，又吃了一大碗菜汤，就辣屋里等称人。一歇歇，西阁爷叔拿出一杆大秤，挂辣客堂间个三步梁浪，阿拉小朋友看见了侪开心起来，边跑边喊：“称人了，称人了，快点来称人！”一歇歇，老老小小来自交关。老太太脚浪穿芦花靴，老公公腰里束蓝布裙，爷叔伯伯呼旱烟，阿婆阿娘扎鞋底，姑娘阿嫂嘻嘻哈哈也来看闹猛。 小囡总是要抢先称，一个个跨上门槛，双手拉牢秤钩，然后憋一口气，双脚一收，秤杆翘起，人就腾空了。看秤个爷叔快手快脚捋秤砣，看一眼秤杆浪个秤花，马上喊出体重：某某31斤、某某43斤、某某52斤、某某某76斤……旁边个大人就开始低声议论：迭个小囡壮了，将来肯定是壮劳力；伊个小囡瘪了，今年白吃饭了！ 有一个怀孕个嫂嫂也想上去称，被隔壁头老姆妈拖牢，咬仔伊个耳朵讲：“大肚皮称勿得，当心养出小囡‘轻骨头’。”嫂嫂听了红仔面孔退下来。 我兄弟姐妹多，屋里经济条件勿好，日脚过得紧紧巴巴。因为平常吃得勿好，我辣同龄人当中相当瘦小，我怕人家笑我“又矮又瘪”，就辣裤袋里向囥了两块石头。呒没想到，勿等爷叔喊出重量，我就因为拉勿牢秤钩跌了一个屁股蹲，裤袋里个石子“咕噜噜”滚了出来。我顾勿得屁股痛，连忙爬起来，一溜烟逃走，背后传来一阵哈哈大笑……后来碰着大年初七，我吃过赤豆饭就跑出去白相，勿想参加称人。 再后来国家改革开放了，阿拉一家门勤勤恳恳做生活，收入年年增加，家境逐步好转，生活过得越来越红火，兄弟姐妹侪长得勿错，我也成了身强力壮个好劳力，再也呒没人嘲笑我了。到了现在，平常日脚过得比老早过年还要好。生活好了，身体开始发福，我又担心自家超重了。 翻翻最近几年个《体检报告》，我个体重侪超过70公斤，年年侪有“脂肪肝”个记录。去年体检辰光，医生特别关照我要加强锻炼。为此，辣几个学生仔个怂恿下，我“八十岁学吹打”，拜学生为师傅，学跳交谊舞。呒没想到效果邪气明显，三个月体重减脱5公斤左右，裤带连缩几扣，已经到了最后一格。老妻讲：“人家讲‘裤带长，寿命短，有钱难买老来瘦’，老头子啊，现在日脚迭能好，阿拉要争取多活几年哟！” 到了现在，“大年初七称人”已经成了遥远个记忆。为了控制体重，女儿、孙囡，伊拉家家屋里侪有电子健康秤，每天侪要称一称，勿但能够精确称量体重，还能智能分析胖瘦变化。发现体重稍微增加一眼，伊拉就要吃素减肥，还买了健身卡，三天两头去锻炼。 | |
| 上一篇：初五迎财神,七步骤教你请财神,... 下一篇：春节的正式结束-头牙 |